ހައްދުންމަތީ (ލ) ކަލައިދޫއަކީ ރާއްޖޭގެ ފުރަތަމަ ވަޒަންވެރިން ދިރިއުޅުނު ގަދީމީ، އިސްރަށް ކަމަށް ބުނެވެއެވެ. ލ. ކަލައިދޫ އަކީ ރާއްޖޭގެ ނިސްބަތުން ބިން ބޮޑު ރަށެކެވެ. ބިމުގައި 264 ހެކްޓަރު ހުންނައިރު، އާމްދަނީ ހޯދުމަށްޓަކައި ރަށު 85 އިންސައްތަ މީހުންކުރާ މައިގަނޑު މަސައްކަތަކީ ދަނޑުވެރިކަމެވެ. މީގެ އިތުރުން 15 އިންސައްތަ މީހުން އެހެނިހެން މަސައްކަތް ކޮށްއުޅެއެވެ. ކަރަންޓްގެ ހިދުމަތް ކަލައިދޫގައި ދެމުންދަނީ ފެނަކަ ކޯޕަރޭސަން ކުންފުނީގެ ފަރާތުންނެވެ. ޖަޕާނު ސަރުކާރުގެ އެހީތެރިކަމާއެކު 2006 ވަނަ އަހަރު ކަލައިދޫގައި ގާއިމްކޮށްދެއްވާފައިވާ ނަރުދަމާގެ ހިދުމަތާއި އަދި 2023 ވަނަ އަހަރު ކަލައިދޫގައި ސަރުކާރުން ގާއިމް ކޮށްފައިވާ ފެނުގެ ނިޒާމް ބަލަހައްޓަމުން ގެންދަނީ ފެނަކަ ކޯޕަރޭސަންގެ ބެލުމުގެ ދަށުންނެވެ. ކަލައިދޫގައި ކައުންސިލުން ޕްރީސުކޫލްގެ ޙިދުމަތް ފޯރުކޮއްދެމުން ދެއެވެ. މީގެ އިތުރުން އެލް.ކޭ.ޖީ އިން ގުރޭޑް 10 އެއް އާއިހިސާބަށް ކިޔަވައިދޭ ސާނަވީ 1 ސުކޫލާއި ރަށުގައި ނަމާދު ކުރުމަށް 2 މިސްކިތް ހުރެއެވެ. ރަށުގައި ކުޅިވަރާއި ކަސްރަތު ކުރެވޭނެ އިންތިޒާމް ވަނީ ހަމަޖެހިފައެވެ. އެގޮތުން ފުޓްސަލް ދަނޑާއި، އައުޓްޑޯ ޖިމް އަދި އިންޑޯ ބެޑްމިންޓަން ހޯލް ޤާއިމް ކޮށްފައިވެއެވެ. 2013 ޑިސެމްބަރ 03 ވަނަ ދުވަހު ރައީސުލްޖުމްހޫރިއްޔާ ނެރުއްވި ޤަރާރަކުން ކަލައިދޫއަކީ މީހުން ދިރިއުޅޭ ވަކި ރަށެއްގެ ގޮތުގައި ކަނޑައެޅުއްވިއެވެ. މިރަށަށް ދީފައިވާ ކޯޑަކީ O-13 އެވެ.